ഇസ്രയേല്‍ കരയുദ്ധം വൈകിക്കുന്നത് അമേരിക്കയുടെ ആവശ്യപ്രകാരം
ടെല്‍അവീവ് : ഗാസയില്‍ കരയുദ്ധത്തിന് ഇസ്രയേല്‍ വൈകുന്നത് അമേരിക്കയുടെ ആവശ്യപ്രകാരമാണെന്ന് റിപ്പോര്‍ട്ട്. അതേസമയം, കരയുദ്ധത്തിന് തയ്യാറെടുക്കുകയാണെന്ന് രാജ്യത്തോട് നടത്തിയ അഭിസംബോധനയില്‍ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു പറഞ്ഞു. കരയുദ്ധം എപ്പോള്‍ ഏത് രീതിയിലായിരിക്കുമെന്ന് വെളിപ്പെടുത്താന്‍ അദ്ദേഹം തയ്യാറായില്ല.
ഗാസയിലെ ഇസ്രയേല്‍ ആക്രമണത്തില്‍ മരണം 6600 ആയി. 24 മണിക്കൂറിനിടെ 756 പേരാണ് കൊല്ലപ്പെട്ടത്. ഇതില്‍ 344 കുട്ടികളും ഉള്‍പ്പെടുന്നു. അല്‍ജസീറ ഗാസ ലേഖകന്റെ ഭാര്യയും രണ്ട് മക്കളും വ്യോമാക്രമണത്തില്‍ കൊല്ലപ്പെട്ടു.
150 ക്യാമ്പുകളിലായി ആറ് ലക്ഷം പേരാണ് കഴിയുന്നത്. ഹമാസ് ബന്ദികളാക്കിയ 220 പേരില്‍ പകുതിയിലധികവും വിദേശികളാണെന്ന് ഇസ്രായേല്‍ വ്യക്തമാക്കി.
