ന്യൂഡല്ഹി: രാജിവെച്ച ബംഗ്ലാദേശ് പ്രധാനമന്ത്രി ഷെയ്ഖ് ഹസീനയുടെ രാഷ്ട്രീയ അഭയത്തിന്റെ കാര്യത്തില് അനിശ്ചിതത്വം തുടരുന്നു. നിലവില് ഇന്ത്യില് ഒരു രഹസ്യകേന്ദ്രത്തിലാണ് അവരുള്ളത്. ഷെയ്ഖ് ഹസീനയുടെ വിസ യു.എസ്. റദ്ദാക്കിയതായി റിപ്പോര്ട്ടുകളുണ്ട്.
രാജിവെച്ച് ഇന്ത്യയിലേക്ക് പലായനംചെയ്ത ഹസീന ഗാസിയാബാദിലെ ഹിന്ഡണ് വ്യോമതാവളത്തിലെത്തിയ ശേഷം രഹസ്യകേന്ദ്രത്തിലേക്ക് മാറുകയായിരുന്നു. എതെങ്കിലും യൂറോപ്യന് രാജ്യത്തേക്ക് പോകാനായിരുന്നു ഹസീനയുടെ പദ്ധതി. എന്നാല്, അവര്ക്ക് അഭയം നല്കാന് യു.കെ. തയ്യാറല്ലെന്നാണ് സൂചന. സഹോദരിക്കൊപ്പമാണ് ഷെയ്ഖ് ഹസീന തിങ്കളാഴ്ച ബംഗ്ലാദേശ് വിട്ടത്. സഹോദരി രെഹാനയ്ക്ക് യു.കെ. പൗരത്വമുണ്ട്. ഇവര് ഹസീനയ്ക്കുമുമ്പേ ഇന്ത്യ വിട്ടേക്കും.
അമേരിക്കയടക്കം വിവിധ പാശ്ചാത്യരാജ്യങ്ങള് ഹസീനയെ പുറത്താക്കുന്നതില് പങ്കുവഹിച്ചെന്ന ആരോപണങ്ങള് ഉയരുന്നുണ്ട്. രാഷ്ട്രീയ അഭയത്തിന്റെ കാര്യത്തില് തീരുമാനമാവുന്നത് വരെ ഹസീന ഇന്ത്യയില് തുടരും. ബംഗ്ലാദേശിന്റെ സൈനികവിമാനത്തിലാണ് ഹസീനയും രെഹാനയും ഇന്ത്യയിലെത്തിയത്. ഇന്ത്യയുടെ ദേശീയ സുരക്ഷാ ഉപദേഷ്ടാവ് അജിത് ഡോവലും മുതിര്ന്ന സൈനിക ഉദ്യോഗസ്ഥരും നേരിട്ട് വിമാനത്താവളത്തിലെത്തി ഹസീനയ്ക്ക് പൂര്ണ സുരക്ഷ വാഗ്ദാനം ചെയ്തിരുന്നു.
