പാരീസ്: പാരീസ് ഒളിമ്പിക്സില് വനിതകളുടെ 50 കിലോ ഗ്രാം ഫ്രീ സ്റ്റൈല് വിഭാഗത്തില് ഫൈനലിലെത്തിയ ഇന്ത്യയുടെ വിനേഷ് ഫോഗട്ടിനെ അയോഗ്യയാക്കി. ഭാരപരിശോധനയില് പരാജയപ്പെട്ടതിനെത്തുടര്ന്നാണ് വിനേഷ് ഫോഗട്ടിനെ അയോഗ്യയാക്കിയത്.
വിനേഷ് ഫോഗട്ടിനെ അയോഗ്യയാക്കിയതായി ഔദ്യോഗികമായി അന്താരാഷ്ട്ര ഒളിമ്പിക് കമ്മിറ്റി(ഐഒസി) അറിയിച്ചു. പ്രധാനമന്ത്രി നരേന്ദ്ര മോദി പാരീസിലുള്ള ഇന്ത്യന് ഒളിമ്പിക് കമ്മിറ്റി അധ്യക്ഷ പി ടി ഉഷയെ ഫോണില് ബന്ധപ്പെട്ട് വിനേഷിന്റെ അയോഗ്യത നീക്കാന് കഴിയാവുന്നതെല്ലാം ചെയ്യണമെന്ന് ആവശ്യപ്പെട്ടിരുന്നു.
ഗുസ്തിയില് മത്സരിക്കുന്ന താരങ്ങളുടെ ശരീരഭാരം മത്സര ദിവസം രാവിലെ പരിശോധിക്കും. ഇന്ന് രാവിലെ നടന്ന ഭാര പരിശോധനയില് വിനേഷ് ഫോഗട്ടിന് അനുവദനീയമായ ഭാരപരിധിയെക്കാള് 100 ഗ്രാം കൂടുതലാണെന്ന് കണ്ടെത്തിയതിനെത്തുടര്ന്നാണ് വിനേഷിനെ 50 കിലോ ഗ്രാം ഫ്രീ സ്റ്റൈല് ഗുസ്തി ഫൈനലിന് മുമ്പ് അയോഗ്യയാക്കിയത്. ഇതോടെ ഒളിമ്പിക്സില് ഇന്ത്യക്ക് ഉറപ്പായ മെഡല് കൂടി നഷ്ടമായി.
ഒളിമ്പിക്സ് നിയമങ്ങള് അനുസരിച്ച് വിനേഷ് ഫോഗട്ടിന് വെള്ളി മെഡലിന് പോലും അര്ഹതയുണ്ടാകില്ല. ഇതോടെ 50 കിലോ ഗ്രാം വിഭാഗത്തില് ഫൈനലിലെത്തിയ അമേരിക്കയുടെ സാറ ഹില്ഡെബ്രാന്ഡ് സ്വര്ണം നേടും. ഈ വിഭാഗത്തില് വെള്ളി മെഡല് ഉണ്ടാകില്ല. വെങ്കലം മാത്രമായിരിക്കും ഇനി സെമി പോരാട്ടത്തില് തോറ്റവര് തമ്മിലുള്ള മത്സരത്തിലെ വിജയികള്ക്ക് നല്കുക.
ഇന്നലെ നടന്ന മത്സരത്തിന് മുമ്പ് വിനേഷിന്റെ ശരീരഭാരം കൃത്യമായിരുന്നു. എന്നാല് ഇന്നലെ രാത്രിയോടെ വിനേഷിന്റെ ശരീരഭാരം ഏതാണ്ട് രണ്ട് കിലോ ഗ്രാമോളം അധികമായി. ഇന്നലെ സെമി ഫൈനല് മത്സരത്തില് ജയിച്ചശേഷം വിനേഷ് ഫോഗട്ട് ഭാരം 50 കിലോ ആയി നിലനിര്ത്താനായി രാത്രി മുഴുവന് കഠിനാധ്വാനം ചെയ്തിരുന്നു.
