കല്പ്പറ്റ: വയനാട്ടിലെ ഉരുള്പൊട്ടല് ദുരന്ത മേഖല പ്രധാനമന്ത്രി നരേന്ദ്ര മോദി സന്ദര്ശിച്ചു. കല്പ്പറ്റയില് നിന്ന് റോഡ് മാര്ഗം ചൂരല്മലയിലെത്തിയ പ്രധാനമന്ത്രി നരേന്ദ്ര മോദി ദുരന്ത ഭൂമിയില് ഏറെ നേരം ചെലവഴിച്ചശേഷം ഉച്ചയ്ക്ക് രണ്ടേ പത്തോടെയാണ് ചൂരല് മലയില് നിന്ന് മടങ്ങിയത്. വെള്ളാര്മല സ്കൂള് റോഡിലായിരുന്നു ആദ്യ സന്ദര്ശനം. ഉരുള്പൊട്ടലില് തകര്ന്ന വെള്ളാര്മല ജിവിഎച്ച്എസ് സ്കൂളും പ്രദേശത്ത് തകര്ന്ന വീടുകളും പ്രധാനമന്ത്രി വാഹനത്തിലിരുന്ന് ആദ്യം കണ്ടു. ഇതിനുശേഷം വെള്ളാര്മല സ്കൂളിലെത്തിയ മോദി സ്കൂളിലെ കുട്ടികളെക്കുറിച്ച് ചോദിച്ചറിഞ്ഞു.
മുഖ്യമന്ത്രി പിണറായി വിജയന്, ഗവര്ണര് ആരിഫ് മുഹമ്മദ് ഖാന്, കേന്ദ്രമന്ത്രി സുരേഷ് ഗോപി, ചീഫ് സെക്രട്ടറി ഡോ. വി വേണു, ജില്ലാ കളക്ടര് മേഘശ്രീ എന്നിവരും പ്രധാനമന്ത്രിക്കൊപ്പമുണ്ടായിരുന്നു.
അരമണിക്കൂറോളം ചൂരല്മലയിലെ ദുരന്ത മേഖല സന്ദര്ശിച്ചശേഷം പ്രധാനമന്ത്രി ബെയ്ലി പാലത്തിലേക്ക് കയറി. പാലത്തിലൂടെ നടന്ന പ്രധാനമന്ത്രി രക്ഷാദൗത്യത്തില് പങ്കാളികളായ ഉദ്യോഗസ്ഥരുമായി സംസാരിച്ചു. എന്ഡിആര്എഫ്, എസ്ഒജി ഉദ്യോഗസ്ഥരുമായും സംസാരിച്ചു. പാലത്തിന്റെ മറുകരയിലുള്ള ഉദ്യോഗസ്ഥരെയും കണ്ടശേഷമാണ് പ്രധാനമന്ത്രി ചൂരല് മലയില് നിന്ന് മടങ്ങിയത്.
സ്കൂള് റോഡില് വെച്ച് എഡിജിപി എംആര് അജിത് കുമാര് രക്ഷാപ്രവര്ത്തനത്തെക്കുറിച്ചും ദുരന്തത്തെക്കുറിച്ചും വിശദീകരിച്ചു. മുഖ്യമന്ത്രി പിണറായി വിജയനും ചീഫ് സെക്രട്ടറിയും ദുരന്ത സ്ഥലത്ത് വെച്ച് പ്രധാനമന്ത്രിയോട് കാര്യങ്ങള് വിശദീകരിച്ചു.
ചൂരല്മലയിലെ ദുരന്തഭൂമി സന്ദര്ശിച്ചശേഷം പ്രധാനമന്ത്രി ദുരിതാശ്വാസ ക്യാമ്പ് സന്ദര്ശിച്ചു. മേപ്പാടി സെന്റ് ജോസഫ്സ് സ്കൂളിലെ ദുരിതാശ്വാസ ക്യാമ്പിലാണ് പ്രധാനമന്ത്രി നരേന്ദ്ര മോദിയെത്തിയത്. ക്യാമ്പുകളില് കഴിയുന്നവരുടെ പ്രതിനിധികളായ ഒമ്പതുപേരുമായിട്ടാണ് മോദി കൂടിക്കാഴ്ച നടത്തിയത്. ദുരന്തത്തില് ഉറ്റവരെ നഷ്ടമായവര് അവരുടെ സങ്കടം പ്രധാനമന്ത്രിയോട് പറഞ്ഞു. 25 മിനിട്ടോളം നേരമാണ് പ്രധാനമന്ത്രി ക്യാമ്പില് ചിലവഴിച്ചത്. ദുരന്തബാധിതരെപ്രധാനമന്ത്രി ആശ്വസിപ്പിച്ചു.
ദുരിതാശ്വാസ ക്യാമ്പിലെ സന്ദര്ശനത്തിനുശേഷം മേപ്പാടിയിലെ വിംസ് ആശുപത്രിയിലും പ്രധാനമന്ത്രി എത്തി. ദുരന്തത്തില് അകപ്പെട്ട് ആശുപത്രിയില് കഴിയുന്ന നാലുപേരെയാണ് മോദി കൂടിക്കാഴ്ച നടത്തിയത്. മേപ്പാടിയിലെ വിംസ് ആശുപത്രിയിലെ സന്ദര്ശനത്തിനുശേഷം കല്പ്പറ്റയിലേക്ക് മടങ്ങുന്ന പ്രധാനമന്ത്രി കളക്ടറേറ്റില് നടക്കുന്ന അവലോകന യോഗത്തില് പങ്കെടുക്കും.
