തിരുവനന്തപുരം: അറബിക്കടലില് കേരള തീരത്തിന് സമീപം ചക്രവാതചുഴി രൂപപ്പെട്ടതും ബംഗാള് ഉള്ക്കടലില് ന്യൂനമര്ദ്ദം ശക്തി പ്രപാിക്കുന്നതും കേരളത്തില് കനത്ത മഴയ്ക്കിടയാക്കുമെന്ന് കാലാവസ്ഥാ മുന്നറിയിപ്പ്. അറബിക്കടലിലും ബംഗാള് ഉള്ക്കടലിലും തീവ്ര ന്യൂനമര്ദ്ദത്തിന് സാധ്യതയെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. അറബിക്കടലില് രൂപപ്പെട്ട ശക്തി കൂടിയ ന്യൂനമര്ദ്ദം അടുത്ത 24 മണിക്കൂറിനുള്ളില് തീവ്ര ന്യൂനമര്ദ്ദമായി ശക്തി പ്രാപിക്കാന് സാധ്യതയെന്നാണ് പ്രവചനം.
കേരളത്തില് അടുത്ത 5 ദിവസം ശക്തമായ മഴക്കും ഇടി മിന്നലിനും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഈ സാഹചര്യത്തില് 4 ദിവസം കേരളത്തില് വിവിധ ജില്ലകളില് ഓറഞ്ച് അലര്ട്ട് അടക്കം പ്രഖ്യാപിച്ചിട്ടുണ്ട്. ഇടുക്കി, എറണാകുളം, മലപ്പുറം, കോഴിക്കോട് ജില്ലകളിലാണ് ഇന്ന് ഓറഞ്ച് അലര്ട്ടുള്ളത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, തൃശ്ശൂര്, പാലക്കാട്, വയനാട്, കണ്ണൂര്, കാസറഗോഡ് ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്.
