കേരള രാഷ്ട്രീയത്തിലെ വന്മരങ്ങള് വീണ നിയമസഭാ തെരഞ്ഞെടുപ്പ് ഫലം പുറത്തുവന്നപ്പോള് ഏറ്റവും വലിയ ആഘാതം നേരിട്ടിരിക്കുന്നത് കേരള കോണ്ഗ്രസ് (എം) ചെയര്മാന് ജോസ് കെ. മാണിക്കാണ്. പാലാ എന്ന തന്റെ തറവാട്ടുമുറ്റത്ത് വീണ്ടും പരാജയപ്പെട്ടുവെന്ന് മാത്രമല്ല, നിയമസഭയില് ഒരൊറ്റ പ്രതിനിധി പോലുമില്ലാത്ത അവസ്ഥയിലേക്ക് പാര്ട്ടി മൂക്കുംകുത്തി വീണു.
പാലായുടെ മണ്ണില് അരനൂറ്റാണ്ടുകാലം കെ.എം. മാണി എന്ന അതികായന് കെട്ടിപ്പടുത്ത സാമ്രാജ്യം ഇന്ന് വാടിക്കൊഴിഞ്ഞു വീണിരിക്കുന്നു. തെരഞ്ഞെടുപ്പ് ഫലം പുറത്തുവന്നപ്പോള് ചരിത്രത്തിലില്ലാത്ത രാഷ്ട്രീയ പ്രതിസന്ധിയിലായി ജോസ് കെ. മാണി. പന്ത്രണ്ട് സീറ്റുകളില് മത്സരിച്ചു, പന്ത്രണ്ടിടത്തും തോല്വി. സ്വന്തം തട്ടകമായ പാലായില് ഹാട്രിക് തോല്വി. കേരള രാഷ്ട്രീയത്തിലെ ‘മാണി’ എന്ന വികാരം ഇനിയൊരിക്കലും തിരിച്ചുവരാത്ത വിധം മാഞ്ഞുപോയോ? ജോസ് കെ. മാണിക്ക് ഇനിയൊരു തിരിച്ചുവരവുണ്ടോ?
തകര്ന്നുവീണ സാമ്രാജ്യം
രണ്ടാം പിണറായി സര്ക്കാരിന്റെ കാലത്ത് എല്.ഡി.എഫിലെ മൂന്നാമത്തെ വലിയ കക്ഷിയായി മാറിയ കേരള കോണ്ഗ്രസ് എം, ഇത്രവേഗം തകര്ന്നടിയുമെന്ന് ആരും കരുതിയിരുന്നില്ല. ജോസഫ് ഗ്രൂപ്പുമായുള്ള തര്ക്കങ്ങള്ക്കൊടുവില് രണ്ടില ചിഹ്നം സ്വന്തമാക്കി ഇടത് മുന്നണിയിലെത്തിയപ്പോള് മാണിപുത്രന്റെ വിജയമായാണ് അത് വിശേഷിപ്പിക്കപ്പെട്ടത്. എന്നാല് 2026-ല് ജനവിധി വന്നപ്പോള് ചിത്രം മാറി.
ജോസ് കെ. മാണിയുടെ പരാജയം കേവലം വ്യക്തിപരമല്ല. അത് കേരള കോണ്ഗ്രസ് രാഷ്ട്രീയത്തിന്റെ തന്നെ നിലനില്പ്പിനെ ബാധിക്കുന്ന ഒന്നാണ്. ക്രൈസ്തവ വോട്ടുകളില് ഉണ്ടായ വിള്ളലും, മാണി സി. കാപ്പന്റെ വ്യക്തിപരമായ സ്വാധീനവും ജോസിന് തിരിച്ചടിയായി. എന്നാല് അതിലുപരി, എല്.ഡി.എഫ് വിരുദ്ധ തരംഗം ആഞ്ഞടിച്ചപ്പോള് അതിന്റെ ആദ്യത്തെ ഇരയായത് മധ്യതിരുവിതാംകൂറിലെ കേരള കോണ്ഗ്രസ് വോട്ടുകളാണ്.
ഇനി എന്ത് സംഭവിക്കും?
പാര്ട്ടിയിലെ പിളര്പ്പ്
നിയമസഭയില് ഒരൊറ്റ എം.എല്.എ പോലുമില്ലാത്ത അവസ്ഥ പാര്ട്ടിക്കുള്ളില് കലാപത്തിന് വഴിവെക്കുമോ? ജോസ് കെ. മാണിയുടെ നേതൃത്വത്തെ ചോദ്യം ചെയ്ത് രണ്ടാം നിര നേതാക്കള് രംഗത്തെത്തുമോ? റോഷി അഗസ്റ്റിനും എന്. ജയരാജും ഉള്പ്പെടെയുള്ള മുതിര്ന്ന നേതാക്കള്ക്ക് ഈ പരാജയം അംഗീകരിക്കാനാവില്ല. അധികാരമില്ലാത്ത കേരള കോണ്ഗ്രസ് എം, മീനച്ചിലാറു പോലെ ശാന്തമായിരിക്കില്ല. മൂന്നുവര്ഷത്തിനുശേഷം ജോസിന്റെ രാജ്യസഭാ കാലാവധി അവസാനിക്കും. രാജ്യസഭാ സീറ്റ് തുടര്ന്നു ലഭിക്കുമോയെന്നുള്ള കാര്യവും പരുങ്ങലിലാണ്.
മുന്നണി മാറ്റം
ഇടത് മുന്നണിയില് കേരള കോണ്ഗ്രസിന് ഇനി എന്ത് പ്രസക്തി എന്ന ചോദ്യം ഉയരാം. വോട്ട് ബാങ്ക് ചോര്ന്നു എന്ന് വ്യക്തമായതോടെ സി.പി.എമ്മിനും ജോസ് കെ. മാണിയോട് പഴയ താല്പര്യം ഉണ്ടാവില്ല. ഈ സാഹചര്യത്തില് ജോസ് യു.ഡി.എഫിലേക്ക് മടങ്ങുമോ? പി.ജെ. ജോസഫ് ഉള്ളിടത്തോളം കാലം തിരിച്ചു പോക്ക് ജോസിന് മാനസികമായി അത്രഎളുപ്പമാകില്ല. ഇനി ബി.ജെ.പി നയിക്കുന്ന എന്.ഡി.എ ആണോ ലക്ഷ്യം? കേരളത്തിലെ രാഷ്ട്രീയ സാഹചര്യം വെച്ച് അതൊരു ആത്മഹത്യാപരമായ നീക്കമാകുമോ?
പാര്ട്ടിയിലെ സ്വാധീനം
കെ.എം. മാണിക്ക് ഉണ്ടായിരുന്ന ‘മാസ്’ സ്വാധീനം ജോസ് കെ. മാണിക്ക് ഉണ്ടോ? പലപ്പോഴും ഹൈടെക് രാഷ്ട്രീയത്തിന് പിന്നാലെ പോയപ്പോള് പാര്ട്ടിയിലെ അടിത്തട്ടിലെ പ്രവര്ത്തകരില് നിന്ന് അദ്ദേഹം അകന്നുപോയോ? കെ.എം മാണിയോടൊപ്പമുണ്ടായിരുന്നവര് ജോസിനെ വിട്ടകലുന്ന കാഴ്ചയാണ് കണ്ടത്. ആരെയും കൂടെ ചേര്ത്തുപിടിച്ചു നിര്ത്താന് ജോസ് ശ്രമിച്ചുമില്ല.
ജോസ് കെ. മാണി ഒരു മികച്ച സംഘാടകനായിരിക്കാം, പക്ഷേ ഒരു ജനകീയ നേതാവായി അദ്ദേഹം ഇനിയും വളരേണ്ടതുണ്ട്. പാലായിലെ തോല്വി സൂചിപ്പിക്കുന്നത് വോട്ടര്മാര്ക്ക് അദ്ദേഹത്തോടുള്ള വിശ്വാസക്കുറവാണ്. കെ.എം. മാണിയുടെ പാരമ്പര്യം മാത്രം കൊണ്ട് ഇനി വോട്ട് പിടിക്കാനാവില്ലെന്ന് ഈ ഫലം തെളിയിക്കുന്നു.
തീരുമാനങ്ങളെടുക്കുന്നതിലെ പാളിച്ചകള്
വേണ്ട സമയത്ത് യുക്തമായ തീരുമാനങ്ങളെടുക്കുന്നതിലാണ് ഒരു രാഷ്ട്രീയക്കാരന്റെ തന്ത്രജ്ഞത. ജോസ് കെ മാണിക്ക് ഇല്ലാതെ പോയതും അതാണ്. യുക്തമായ തീരുമാനങ്ങളെടുക്കുന്നതില് ജോസ് കാണിച്ച അലംഭാവമാണ് ഇന്നത്തെ വീഴ്ചയിലേക്ക് അദ്ദേഹത്തെ എത്തിച്ചത്.
കേന്ദ്രത്തില് മന്ത്രിസ്ഥാനം മോഹിച്ച് രാജ്യസഭാ മെമ്പറാകാന് പോയതുമുതല് തുടങ്ങിയ പാളിച്ചകള്. പാലായില് നടന്ന പൊതുയോഗത്തില് അണികള് പി.ജെ ജോസഫിനെ കൂവിയപ്പോള് അവരെ ശാസിച്ചിരുത്താതെ ജോസ് മൗനം പാലിച്ചത് അന്നത്തെ പിളര്പ്പിന് വേഗം കൂട്ടി.
ഇടതുമുന്നണിയിലേക്കുള്ള ചാട്ടവും തെരഞ്ഞെടുപ്പില് ജയിക്കാനാകാതെ പോയതും റോഷി അഗസ്റ്റിനെ മന്ത്രിയാക്കേണ്ടിവന്നതും പാര്ട്ടിക്കുള്ളിലെ ജോസിന്റെ സ്വാധീനത്തിന് ഇടിവു വരുത്തി. ഏറ്റവുമൊടുവില് തെരഞ്ഞെടുപ്പിന് തൊട്ടുമുമ്പ് യുഡിഎഫിലേക്ക് കയറാന് അവസരം കിട്ടിയപ്പോള് അതും കളഞ്ഞുകുളിച്ചു. റോഷിയുടെ തന്ത്രത്തിനു മുന്നില് നിസഹായനായി നില്ക്കുന്ന ജോസ് കെ മാണിയെയാണ് അന്ന് കണ്ടത്.
മുന്നോട്ടുള്ള യാത്ര
പരാജയം ഒന്നിന്റെയും അവസാനമല്ല. മറിച്ച് തിരുത്തലുകള്ക്കുള്ള അവസരമാണ്. ജോസ് കെ. മാണിക്ക് മുന്നില് ഇനിയും ചില വഴികളുണ്ട്:
പുനഃസംഘടന:
പാര്ട്ടിയെ അടിമുടി അഴിച്ചുപണിയുക. യുവജനങ്ങള്ക്ക് പ്രാധാന്യം നല്കി പുതിയൊരു കേഡര് സ്വഭാവം വളര്ത്തുക.
വിഷയങ്ങളില് ഇടപെടല്:
കര്ഷകരുടെ പ്രശ്നങ്ങളില്, പ്രത്യേകിച്ച് റബ്ബര് വിലയും വന്യജീവി ആക്രമണവും പോലുള്ള കാര്യങ്ങളില് ശക്തമായ നിലപാടെടുത്ത് ജനങ്ങളിലേക്ക് ഇറങ്ങിച്ചെല്ലുക.
ക്ഷമയോടെയുള്ള കാത്തിരിപ്പ്:
രാഷ്ട്രീയത്തില് തിരിച്ചടികള് സ്വാഭാവികമാണ്. അടുത്ത തദ്ദേശ തെരഞ്ഞെടുപ്പില് കരുത്ത് തെളിയിച്ചുകൊണ്ട് തിരിച്ചു വരാന് ശ്രമിക്കുക.
അവസാന വാക്ക്
ചരിത്രം മാപ്പുകൊടുക്കാത്തത് തോറ്റവര്ക്കല്ല, തോറ്റ് പിന്മാറുന്നവര്ക്കാണ്. ജോസ് കെ. മാണി ഏത് വഴിയേ സഞ്ചരിക്കും എന്നതായിരിക്കും വരും ദിവസങ്ങളില് രാഷ്ട്രീയകേരളം ആകാംക്ഷയോടെ ഉറ്റുനോക്കുന്നത്.
