കല്പ്പറ്റ: വയനാട് ദുരന്തത്തിനിരയാവരെ പുനരധിവാസത്തിനായി പ്രത്യേക പദ്ധതികള് തയാറാക്കുന്നു. ദുരന്തത്തിന് ഇരയായവര്ക്കുള്ള സ്ഥിരമായ പുനരവധിവാസ പദ്ധതിയാണ്് പരിഗണിക്കുന്നത്. രാജ്യത്തെ തന്നെ ഏറ്റവും ബൃഹത്തായ പുനരധിവാസ പദ്ധതിയാണ് ആലോചനയിലുള്ളതെന്നാണ് റിപ്പോര്ട്ട്. ടൗണ്ഷിപ്പ് നിര്മിച്ച് ഇവരെ സാധാരണ ജീവിതത്തിലേക്ക് മടക്കിക്കൊണ്ടുവരാനാണ് സര്ക്കാര് ശ്രമം.
സംസ്ഥാന മന്ത്രിസഭായോഗം ഇന്ന് രാവിലെ ഒമ്പതരക്ക് ഓണ്ലൈനായി ചേരുന്നുണ്ട്. വയനാട്ടില് ദുരന്തത്തിനിരയായവരുടെ പുനരധിവാസമാണ് യോഗത്തിലെ പ്രധാന അജണ്ട. താല്ക്കാലിക ക്യാമ്പുകളില് കഴിയുന്നവരെ ആദ്യം വാടക വീടുകളിലേക്ക് മാറ്റാനാണ് നിലവിലെ തീരുമാനം.
അതേസമയം ക്യാമ്പുകളില് കഴിയുന്നവര്ക്ക് നഷ്ടപ്പെട്ട റേഷന് കാര്ഡുകള് ഇന്ന് മുതല് വിതരണം ചെയ്യും. ക്യാമ്പുകളില് കഴിയുന്നവരുടെ രക്ത സാമ്പിളുകള് ഡിഎന്എ പരിശോധനയുടെ ഭാഗമായി ശേഖരിക്കും.
വയനാട് ദുരന്തത്തിന്റെ ഒന്പതാം ദിവസമായ ഇന്നും കാണാതായവര്ക്ക് വേണ്ടിയുള്ള തെരച്ചില് തുടരും. ഇന്ന് വിവിധ വകുപ്പുകളുടെ മേധാവിമാര് ചേര്ന്നാണ് പരിശോധന നടത്തുക. നേരത്തെ പരിശോധന നടത്തിയ ഇടങ്ങളില് വീണ്ടും വിശദമായ പരിശോധന നടത്തും. സൂചിപ്പാറ വെള്ളച്ചാട്ടത്തിന് താഴെ ഹെലികോപ്റ്ററില് ഇറങ്ങിയ പ്രത്യേക സംഘം ഇന്നലെ നാലു കിലോമീറ്റര് ദൂരം പരിശോധന നടത്തിയിരുന്നു. ഇന്ന് ആറു കിലോമീറ്റര് ദൂരം പരിശോധന നടത്താനാണ് ഒരുങ്ങുന്നത്.
പുത്തുമലയിലെ ശ്മശാനഭൂമി പ്രത്യേക വേലി കെട്ടിത്തിരിച്ച്, സ്ഥിരം ശ്മശാനഭൂമിയാക്കും. തിരിച്ചറിയാത്ത 218 മൃതദേഹം ഇതുവരെ സംസ്കരിച്ചു. 152 പേരെയാണ് ഇനിയും കണ്ടെത്താനുള്ളത്. പുത്തുമലയില് കൂടുതല് ഭൂമി ഏറ്റെടുത്തിട്ടുണ്ട്. 20 സെന്റ് ഭൂമിയാണ് അധികമായി ഏറ്റെടുത്തത്. നിലവില് മൃതദേഹങ്ങള് സംസ്കരിച്ചിട്ടുള്ള ഭൂമിയോട് ചേര്ന്നാണ് അധിക ഭൂമിയുമുള്ളത്. ഇവിടെ തിരിച്ചറിഞ്ഞിട്ടില്ലാത്തവരുടെ സംസ്കാരം ഇന്നും തുടരും.
