ലോകം മുഴുവന് ഉറ്റുനോക്കുന്നത് ബീജിംഗിലേക്കാണ്. അമേരിക്കന് പ്രസിഡന്റ് ഡൊണാള്ഡ് ട്രംപ് വീണ്ടും ചൈനീസ് മണ്ണില് കാലുകുത്തിയിരിക്കുന്നു. ട്രംപിന്റെ കണ്ണിലെ കരടാണ് ചൈന. അതുകൊണ്ട്ുതന്നെ ഒന്നും കാണാതെ ട്രംപ് ചൈനയിലെത്തില്ലെന്നുറപ്പാണ്. ട്രംപിന് എന്തും ഏതും കച്ചവടമാണ്. അതിനാല് ഇത് വെറുമൊരു ഔദ്യോഗിക സന്ദര്ശനമല്ല; ലോകത്തെ രക്ഷിക്കാനുമല്ല. അമേരിക്കയെ രക്ഷിക്കാനുള്ള ‘ബിസിനസ് ഡീലു’ മായിട്ടായിരിക്കും ട്രംപ് ചൈനയിലെത്തിയിരിക്കുന്നത്.
‘അമേരിക്ക ഫസ്റ്റ്’ എന്ന് പ്രസംഗിക്കുന്ന ട്രംപ് എന്തിനായിരിക്കും ചൈനയുമായി കൈകോര്ക്കുന്നതെന്നു പരിശോധിക്കാം.
സമ്പദ്വ്യവസ്ഥയുടെ തകര്ച്ച:
അമേരിക്കയില് പണപ്പെരുപ്പം നിയന്ത്രണാതീതമായി തുടരുന്നു. ചൈനയില് നിന്നുള്ള ഇറക്കുമതി കുറഞ്ഞതും വ്യാപാര യുദ്ധവും സാധാരണക്കാരുടെ ജീവിതത്തെ ബാധിച്ചു. വരാനിരിക്കുന്ന മിഡ്-ടേം ഇലക്ഷനില് തിരിച്ചടി ഒഴിവാക്കാന് ട്രംപിന് ചൈനയുമായി ഒരു സാമ്പത്തിക ധാരണ ആവശ്യമാണ്.
അസംസ്കൃത വസ്തുക്കളുടെ നിയന്ത്രണം : ഇലക്ട്രിക് വാഹനങ്ങള്ക്കും ആധുനിക ആയുധങ്ങള്ക്കും ആവശ്യമായ ‘റെയര് എര്ത്ത്’ ലോഹങ്ങളുടെ 90 ശതമാനവും ചൈനയുടെ കൈവശമാണ്. ഈ വിതരണ ശൃംഖല പുനഃസ്ഥാപിക്കാതെ അമേരിക്കയ്ക്ക് മുന്നോട്ട് പോകാനാവില്ല.
ഇറാന് പ്രതിസന്ധി: ഇറാനുമായുള്ള യുദ്ധം അമേരിക്കന് ഖജനാവിനെ കാലിയാക്കുകയാണ്. ഈ യുദ്ധം അവസാനിപ്പിക്കാന് ഇറാന്റെ ഏറ്റവും വലിയ എണ്ണ ഉപഭോക്താവായ ചൈനയുടെ ഇടപെടല് അനിവാര്യമാണ്.
ഇറാനുമായുള്ള യുദ്ധം ഇന്ന് മൂന്നാം മാസത്തിലേക്ക് കടന്നിരിക്കുന്നു. ഹോര്മുസ് കടലിടുക്ക് അടഞ്ഞുകിടക്കുന്നത് ലോകത്തെ ഇന്ധന വില കുതിച്ചുയരാന് കാരണമായി.
ഇറാന്റെ മേല് സാമ്പത്തിക സമ്മര്ദ്ദം ചെലുത്താന് ചൈനയുടെ സഹായം വേണം. ചൈന ഇറാനില് നിന്ന് എണ്ണ വാങ്ങുന്നത് നിര്ത്തിയാല് ഇറാന് ചര്ച്ചയ്ക്ക് തയ്യാറാകുമെന്ന് ട്രംപ് വിശ്വസിക്കുന്നു.
ചൈന ഈ യുദ്ധത്തില് ഒരു മധ്യസ്ഥനായി മാറാനാണ് സാധ്യത. ട്രംപ് ചൈനയ്ക്ക് വ്യാപാര ഇളവുകള് നല്കിയാല്, ഇറാനെ ചര്ച്ചാ മേശയിലേക്ക് എത്തിക്കാമെന്ന് ഷി ജിന്പിങ് ഉറപ്പുനല്കിയേക്കാം. ഇത് യുദ്ധത്തിന്റെ തീവ്രത കുറയ്ക്കാന് സഹായിക്കും.
ട്രംപിന്റെ രാഷ്ട്രീയം വളരെ ലളിതമാണ്.
അമേരിക്കന് ജനങ്ങള്ക്ക് മുന്നില് വിജയിയായ നേതാവായി നില്ക്കണം.
അതിന് മൂന്ന് കാര്യങ്ങള് അദ്ദേഹത്തിന് അത്യാവശ്യമാണ്.
ഒന്ന്… അമേരിക്കന് സമ്പദ്വ്യവസ്ഥ സ്ഥിരതയിലാക്കണം.
രണ്ട്… എണ്ണവില നിയന്ത്രിക്കണം.
മൂന്ന്… ഇറാന് യുദ്ധം നിയന്ത്രണാതീതമാകരുത്.
അമേരിക്കയിലെ സാധാരണ ജനങ്ങള് ഇപ്പോള് വിലക്കയറ്റത്തില് അസന്തുഷ്ടരാണ്. ഇന്ധനവില ഉയര്ന്നാല് അത് ട്രംപിന്റെ ജനപ്രീതിയെ ബാധിക്കും.
അതുകൊണ്ടാണ് ട്രംപ് ഇപ്പോള് ചൈനയുമായി ഏറ്റുമുട്ടലിന് പകരം ഇടപാടിലേക്ക് മാറുന്നതെന്ന വിലയിരുത്തലും ഉണ്ട്.
അമേരിക്കയ്ക്ക് ഇന്ന് ഒരു യാഥാര്ഥ്യം മനസ്സിലായി.
ചൈനയെ പൂര്ണമായി ഒറ്റപ്പെടുത്തുക അസാധ്യമാണ്.
ലോക നിര്മാണ മേഖലയിലെ കേന്ദ്രമാണ് ചൈന. അമേരിക്കന് കമ്പനികള്ക്കും ചൈനീസ് വിപണി ആവശ്യമാണ്.
അതേസമയം ചൈനയ്ക്കും അമേരിക്കന് ഉപഭോക്താക്കളെ നഷ്ടപ്പെടുത്താന് കഴിയില്ല.
അതുകൊണ്ടാണ് ഇപ്പോള് ലോകം കേള്ക്കുന്ന പുതിയ വാക്ക്… ‘Managed Rivalry’.
അതായത്… മത്സരം തുടരും. പക്ഷേ പൂര്ണ യുദ്ധമല്ല.
ചൈനയ്ക്ക് ഈ കൂടിക്കാഴ്ചയില് നിന്ന് ലഭിക്കാനേറെയുണ്ട്.
ആദ്യം… ലോകത്തിന് മുന്നില് ഒരു സന്ദേശം നല്കണം.
അതായത് അമേരിക്കയ്ക്കു പോലും ഇപ്പോള് ചൈനയെ അവഗണിക്കാനാവില്ലെന്നുള്ള സന്ദേശം.
രണ്ടാമത്… അമേരിക്കന് ടാരിഫുകളും ടെക്നോളജി നിയന്ത്രണങ്ങളും കുറയ്ക്കണം.
മൂന്നാമത്… തായ്വാന് വിഷയത്തില് അമേരിക്കയുടെ നിലപാട് മൃദുവാക്കണം.
ഇതിനൊപ്പം മറ്റൊരു പ്രധാന ലക്ഷ്യവും ഉണ്ട്.
ചൈന ഇനി വെറും സാമ്പത്തിക ശക്തിമാത്രമല്ലെന്ന് തെളിയിക്കണം. ലോക പ്രതിസന്ധികള് പരിഹരിക്കുന്ന ആഗോള ശക്തിയായി മാറണമെന്നാണ് ബീജിംഗിന്റെ ആഗ്രഹം.
അതുകൊണ്ടാണ് ചൈന ഇപ്പോള് മിഡില് ഈസ്റ്റ് സമാധാന ചര്ച്ചകളിലും സജീവമാകുന്നത്.
ഒരു കാലത്ത് അമേരിക്ക മാത്രം കൈകാര്യം ചെയ്തിരുന്ന മേഖലകളില് ഇപ്പോള് ചൈനയും ഇടപെടുന്നു.
ഇത് ലോകശാക്തിക സന്തുലിതാവസ്ഥ മാറുന്നതിന്റെ സൂചനയാണ്.
അമേരിക്കയും ചൈനയും തമ്മില് അടുക്കുന്നത് ഇന്ത്യയെ സംബന്ധിച്ചിടത്തോളം വലിയൊരു നയതന്ത്ര വെല്ലുവിളിയാണ്.
തന്ത്രപരമായ സ്വയംഭരണം :
ചൈനയെ പ്രതിരോധിക്കാന് അമേരിക്ക ഇന്ത്യയെ ഉപയോഗിക്കുന്നു എന്നായിരുന്നു ഇതുവരെയുള്ള വിലയിരുത്തല്. എന്നാല് ട്രംപ് ചൈനയുമായി അടുക്കുന്നത് ക്വാഡ് പോലുള്ള സഖ്യങ്ങളുടെ പ്രസക്തി കുറയ്ക്കും.
അതിര്ത്തി തര്ക്കം:
ലഡാക്കിലും അരുണാചലിലും ചൈനീസ് കടന്നുകയറ്റം തുടരുമ്പോള്, ട്രംപ് ചൈനയുമായി വ്യാപാര കരാറുകളില് ഏര്പ്പെടുന്നത് ഇന്ത്യയ്ക്ക് വലിയ തിരിച്ചടിയാണ്. ചൈനയ്ക്കെതിരെ അമേരിക്ക നല്കിയിരുന്ന പിന്തുണ കുറഞ്ഞേക്കാം.
അതുപോലെ തന്നെ ട്രംപ് ചൈനയുമായി നേരിട്ട് ഡീല് നടത്തുമ്പോള് ആഗോള രാഷ്ട്രീയത്തില് ഇന്ത്യയുടെ ‘ബാര്ഗെയിനിംഗ് പവര്’ കുറഞ്ഞേക്കാം.
അമേരിക്കയും ചൈനയും ഒരുമിച്ച് തീരുമാനങ്ങള് എടുക്കുന്ന ലോകക്രമം വന്നാല്, അത് ഇന്ത്യയെപ്പോലെയുള്ള വളരുന്ന ശക്തികളെ തഴയാന് കാരണമായേക്കാം.
ട്രംപ്- ഷി ജിന്പിങ്ങ് കൂടിക്കാഴ്ച ലോകത്തെ എങ്ങനെയൊക്കെ ബാധിക്കും?
തായ്വാന് പ്രശ്നം:
ചൈന തായ്വാനില് നടത്തുന്ന അവകാശവാദങ്ങളില് ട്രംപ് മൗനം പാലിച്ചേക്കാം. പകരമായി ചൈന അമേരിക്കന് ഉല്പ്പന്നങ്ങള് (Boeing വിമാനങ്ങള്, സോയാബീന്) വന്തോതില് വാങ്ങും.
റഷ്യ-യുക്രെയ്ന് യുദ്ധം:
ചൈനയുമായുള്ള അടുപ്പം വഴി റഷ്യയെ ഒറ്റപ്പെടുത്താന് ട്രംപിന് സാധിക്കുമോ എന്നത് കണ്ടറിയണം.
സാങ്കേതിക വിദ്യ:
എഐ, ചിപ്പ് നിര്മ്മാണം എന്നിവയില് പുതിയ നിയന്ത്രണങ്ങളോ അല്ലെങ്കില് സഹകരണമോ ഉണ്ടായേക്കാം.
രാഷ്ട്രീയത്തില് സ്ഥിരമായ ശത്രുക്കളോ മിത്രങ്ങളോ ഇല്ല, താല്പര്യങ്ങള് മാത്രമേയുള്ളൂ എന്ന ട്രംപിന്റെ നയം ഒരിക്കല് കൂടി തെളിയുകയാണ്. ഈ സന്ദര്ശനം ഇറാന് യുദ്ധത്തിന് അന്ത്യം കുറിക്കുമോ, അതോ ചൈന കൂടുതല് ആഗോളാധിപത്യം നേടുമോ എന്നതാണ് വരും നാളുകളില് കാണാനിരിക്കുന്നത്.
ചൈനീസ് ഡ്രാഗണും അമേരിക്കന് ഈഗിളും തമ്മിലുള്ള ഈ പുതിയ കൂട്ടുകെട്ട് ലോകത്തെ സമാധാനത്തിലേക്കാണോ അതോ പുതിയൊരു സാമ്പത്തിക ക്രമത്തിലേക്കായിരിക്കുമോ നയിക്കുന്നത്?
