പാറ്റകളുടെ സമരം തണുക്കുന്നുവോ? സര്‍ക്കാരിന്റെ രഹസ്യതന്ത്രം വിജയിച്ചോ?

കോക്രോച്ച് ജനതാ പാര്‍ട്ടി അഥവാ CJP-യുടെ നേതൃത്വത്തില്‍ ഡല്‍ഹിയില്‍ നടക്കുന്ന സമരം ഇന്ന് മൂന്നാം ദിവസത്തിലേക്ക് കടന്നിരിക്കുന്നു. നീറ്റ് പരീക്ഷാ ക്രമക്കോടുകള്‍ക്കെതിരെ
ശനിയാഴ്ച ഉച്ചയ്ക്ക് തുടങ്ങിയതാണ് ഈ ധര്‍ണ്ണ.
പോലീസിന്റെ കണ്‍മുന്നില്‍, കൊടും തണുപ്പിലും ചൂടിലും അവര്‍ രാത്രിയും പകലും തെരുവില്‍ തന്നെയാണ്. സന്നദ്ധ പ്രവര്‍ത്തകര്‍ നല്‍കുന്ന ഭക്ഷണവും ജ്യൂസുമാണ് ഇവര്‍ക്ക് ഏക ആശ്രയം. ജന്തര്‍ മന്ദറില്‍ മുഴങ്ങിക്കേള്‍ക്കുന്നത് ‘പാറ്റകള്‍ പിന്നോട്ടില്ല’ എന്ന മുദ്രാവാക്യമാണ്.
‘രാജ്യം മുഴുവന്‍ ഈ സമരം പടര്‍ന്നു പിടിക്കുമെന്നായിരുന്നു ശനിയാഴ്ച ഉച്ചയ്ക്ക് സമരത്തിന് തുടക്കമിടുമ്പോള്‍ സിജെപി കരുതിയത്. എന്നാല്‍ സമരം മൂന്നാം ദിവസത്തിലേക്ക് എത്തുമ്പോള്‍, ജന്തര്‍ മന്ദറിലെ ആള്‍ക്കൂട്ടത്തിന് എന്ത് പറ്റി?
സോഷ്യല്‍ മീഡിയയില്‍ ലക്ഷക്കണക്കിന് ആളുകള്‍ പങ്കുവെച്ച, രാജ്യം മുഴുവന്‍ കത്തുമെന്ന് കരുതിയ ഈ ‘പാറ്റ സമരം’ ശരിക്കും തണുത്തുപോയോ? ഫേസ്ബുക്കിലും ഇന്‍സ്റ്റാഗ്രാമിലും കണ്ട ആവേശം എന്തുകൊണ്ട് തെരുവില്‍ കാണുന്നില്ല?
ആദ്യ ദിവസങ്ങളിലെ ആള്‍ക്കൂട്ടം ഇന്ന് ജന്തര്‍ മന്ദറിലില്ല. സമരം വെറുമൊരു ഡല്‍ഹി കേന്ദ്രീകൃത പ്രതിഷേധമായി ഒതുങ്ങുകയാണോ? സോഷ്യല്‍ മീഡിയയിലെ ഡിജിറ്റല്‍ വിപ്ലവം എന്തുകൊണ്ട് ഒരു ജനകീയ മുന്നേറ്റമാകുന്നില്ല?
എന്തുകൊണ്ടാണ് സമരത്തിന്റെ പങ്കാളിത്തം കുറയുന്നത്? ഈ സമരത്തിന്റെ ഗതി മാറ്റത്തെ നമ്മള്‍ കൃത്യമായി വിശകലനം ചെയ്യേണ്ടതുണ്ട്. ഇതിന് പ്രധാനമായും മൂന്ന് കാരണങ്ങളാണുള്ളത്.
ഒന്നാമത്തെ കാരണം: ഡിജിറ്റല്‍ ആക്ടിവിസവും തെരുവും തമ്മിലുള്ള വ്യത്യാസം.
സോഷ്യല്‍ മീഡിയയില്‍ ഒരു പോസ്റ്റ് ലൈക്ക് ചെയ്യാനോ, ഷെയര്‍ ചെയ്യാനോ ഒരു സെക്കന്‍ഡ് മതി. അതിന് വലിയ അധ്വാനമില്ല. ഒരു എയര്‍കണ്ടീഷന്‍ മുറിയിലിരുന്ന് ആര്‍ക്കും വിപ്ലവം പ്രവചിക്കാം, പ്രോത്സാഹിപ്പിക്കാം. എന്നാല്‍, ഡല്‍ഹിയിലെ കൊടും ചൂടില്‍, പോലീസിന്റെ ലാത്തിക്ക് മുന്നില്‍, ദിവസങ്ങളോളം തെരുവില്‍ കിടക്കുകയെന്നത് അത്ര എളുപ്പമുള്ള കാര്യമല്ല. സോഷ്യല്‍ മീഡിയയിലെ ആവേശം ഒരു ‘ക്ലിക്ക്’ മാത്രമായി ഒതുങ്ങിപ്പോകും. അത് തെരുവിലെ ജനക്കൂട്ടമായി മാറുന്നില്ല.
രണ്ടാമത്തെ കാരണം: രാഷ്ട്രീയ സംഘടനകളുടെ അഭാവം.
ഒരു സമരം ദീര്‍ഘനാള്‍ മുന്നോട്ട് പോകണമെങ്കില്‍ അതിന് കൃത്യമായ ഒരു ഓര്‍ഗനൈസേഷണല്‍ സ്ട്രക്ചര്‍ വേണം. സി.ജെ.പി എന്ന സംഘടന ഒരു സോഷ്യല്‍ മീഡിയ കൂട്ടായ്മ പോലെയാണ് തുടങ്ങിയത്. അവര്‍ക്ക് താഴേത്തട്ടില്‍ വലിയ കേഡര്‍ സംവിധാനമില്ല.
ഇത് മനസ്സിലാക്കിയതുകൊണ്ട് തന്നെയാണ്, സമരം ശക്തമാക്കാന്‍ പാറ്റകള്‍ ഇപ്പോള്‍ ഇടതുപക്ഷ സംഘടനകളുമായി ചര്‍ച്ച നടത്തുന്നത്. എസ്.എഫ്.ഐ, എ.ഐ.എസ്.എഫ് പോലുള്ള ശക്തമായ വിദ്യാര്‍ത്ഥി പ്രസ്ഥാനങ്ങളുടെ പിന്തുണയോടെ ആളുകളെ എത്തിക്കാനാണ് അവരുടെ ശ്രമം. കാരണം, കൃത്യമായ രാഷ്ട്രീയ പിന്തുണയില്ലാതെ ഇത്തരം വലിയ സമരങ്ങള്‍ക്ക് ദീര്‍ഘനാള്‍ നിലനില്‍ക്കാന്‍ കഴിയില്ല എന്ന യാഥാര്‍ത്ഥ്യം അവര്‍ തിരിച്ചറിഞ്ഞു കഴിഞ്ഞു.
മൂന്നാമത്തെയും ഏറ്റവും പ്രധാനപ്പെട്ടതുമായ കാരണം: സര്‍ക്കാരിന്റെ അവഗണനാ തന്ത്രമാണ്.
സമരം തുടങ്ങി മൂന്ന് ദിവസമായിട്ടും ഭരണകൂടത്തിന്റെ ഭാഗത്തുനിന്ന് ഒരു ചെറിയ പ്രതികരണം പോലും ഉണ്ടായിട്ടില്ല. എന്തുകൊണ്ടാണ് സര്‍ക്കാര്‍ മിണ്ടാതിരിക്കുന്നത്? പൊലീസിന്റെ ഭാഗത്തുനിന്ന് എന്തെങ്കിലും തരത്തിലുള്ള പ്രകോപനം ഉണ്ടായാല്‍, അത് സമരക്കാര്‍ക്ക് കൂടുതല്‍ ഊര്‍ജ്ജം നല്‍കും. മാധ്യമങ്ങള്‍ അത് വലിയ വാര്‍ത്തയാക്കും.
അതുകൊണ്ട്, സമരത്തെ പൂര്‍ണ്ണമായി അവഗണിക്കുക. അവരുമായി ചര്‍ച്ചയ്ക്ക് പോകാതിരിക്കുക. സമരം ചെയ്യുന്നവര്‍ കുറച്ചു ദിവസം ഇരുന്ന് സ്വയം മടുത്തു പൊയ്‌ക്കോളും എന്നൊരു വിചാരം സര്‍ക്കാരിനുണ്ട്. ‘പ്രകോപിപ്പിച്ച് സമരത്തിന് ജീവന്‍ നല്‍കേണ്ട’ എന്ന കൃത്യമായ രാഷ്ട്രീയ തന്ത്രമാണ് ഇവിടെ പ്രയോഗിക്കുന്നത്. സമരത്തില്‍ ആളു കുറയുന്നത് സര്‍ക്കാരിന്റെ ഈ തന്ത്രത്തിന് കൂടുതല്‍ ബലം നല്‍കുന്നു.
ഇതൊന്നുമല്ലാത്ത മറ്റൊരു കാരണം കൂടിയുണ്ട്. പൊതുസമൂഹത്തിന്റെ മരവിപ്പ്.
നമ്മുടെ മധ്യവര്‍ഗ സമൂഹം ഇത്തരം ക്രമക്കേടുകളോട് പൊരുത്തപ്പെട്ടു കഴിഞ്ഞു എന്നൊരു ഭയപ്പെടുത്തുന്ന യാഥാര്‍ത്ഥ്യമുണ്ട്. പരീക്ഷാ ചോര്‍ച്ചകള്‍ ഇവിടെ ഒരു സ്ഥിരം വാര്‍ത്ത മാത്രമായി മാറുന്നു. സിസ്റ്റത്തോട് പോരാടുന്നതിനേക്കാള്‍, അതിനോട് അഡ്ജസ്റ്റ് ചെയ്യാന്‍ ജനങ്ങള്‍ ശീലിച്ചിരിക്കുന്നു. ഈ മരവിപ്പും സമരപ്പന്തലില്‍ ആളുകള്‍ കുറയാനുള്ള മറ്റൊരു കാരണമാണ്.
ഇനി എന്താണ് സംഭവിക്കാന്‍ പോകുന്നത്? രണ്ട് വഴികളാണ് ഈ സമരത്തിന് മുന്നിലുള്ളത്.
സാധ്യത ഒന്ന്: സമരം ഒരു വലിയ ജനകീയ പ്രക്ഷോഭമായി മാറുന്നു.
ഇന്ന് വൈകുന്നേരം നടക്കുന്ന മെഴുകുതിരി പ്രതിഷേധം ഈ സമരത്തിന്റെ ടേണിങ് പോയിന്റ് ആയേക്കാം. ഇടതുപക്ഷ സംഘടനകളുടെ പിന്തുണയോടെ, ഡല്‍ഹിയിലെ മറ്റ് സര്‍വ്വകലാശാലകളായ JNU, ജാമിയ മില്ലിയ, ഡല്‍ഹി യൂണിവേഴ്‌സിറ്റി എന്നിവിടങ്ങളില്‍ നിന്നുള്ള വിദ്യാര്‍ത്ഥികള്‍ കൂടി ജന്തര്‍ മന്ദറിലേക്ക് എത്തിയാല്‍ ചിത്രമാകെ മാറും.
അങ്ങനെയെങ്കില്‍, സമരം ഡല്‍ഹിയില്‍ നിന്ന് മറ്റ് സംസ്ഥാനങ്ങളിലെ ക്യാമ്പസുകളിലേക്ക് പടരും. കേരളം, തമിഴ്നാട്, കര്‍ണാടക തുടങ്ങിയ സംസ്ഥാനങ്ങളില്‍ വിദ്യാര്‍ത്ഥികള്‍ തെരുവിലിറങ്ങിയാല്‍ സര്‍ക്കാരിന് കൂടുതല്‍ കാലം നിശബ്ദത പാലിക്കാന്‍ കഴിയില്ല. അവര്‍ക്ക് ചര്‍ച്ചയ്ക്ക് തയ്യാറാകേണ്ടി വരും. അത് ഈ സമരത്തിന്റെ വലിയ വിജയമായിരിക്കും.
സാധ്യത രണ്ട്: സര്‍ക്കാരിന്റെ കാത്തിരിപ്പ് തന്ത്രം വിജയിക്കുക. ദിവസങ്ങള്‍ കഴിയുമ്പോള്‍ വിദ്യാര്‍ത്ഥികളും പൊതുജനങ്ങളും ഇത് മറക്കും. സമരം ആരുമറിയാതെ അവസാനിക്കും.
പാറ്റകളുടെ ഈ പോരാട്ടം വെറുമൊരു സോഷ്യല്‍ മീഡിയ ട്രെന്‍ഡായി അവസാനിക്കുമോ, അതോ രാജ്യത്തെ പിടിച്ചുകുലുക്കുന്ന ജനകീയ പ്രക്ഷോഭമാകുമോ?
ഇന്ന് വൈകുന്നേരം ജന്തര്‍ മന്ദറില്‍ കത്തുന്ന മെഴുകുതിരി വെളിച്ചം ഈ ചോദ്യങ്ങള്‍ക്കെല്ലാം ഉത്തരം നല്‍കും.