ലോകം ഇതുവരെ കാണാത്ത ഒരു സാമ്പത്തിക മഹാദുരന്തത്തിലേക്കാണോ നീങ്ങുന്നത്? അതിവേഗത്തിലാണ് കാര്യങ്ങള് കൈവിട്ടുപോകുന്നത്. അമേരിക്കയുടെ ഇടപെടല് അവസാനിക്കുന്നത് വരെ ‘ഹോര്മുസ് കടലിടുക്ക്’ ഇറാന് പൂര്ണമായി അടച്ചുപൂട്ടിയിരിക്കുന്നു! ഇനിയൊരു അറിയിപ്പ് ഉണ്ടാകുന്നത് വരെ അവിടെ ഒരു കപ്പല് പോലും അനങ്ങില്ലെന്നാണ് ഇറാന് പറയുന്നത്. മറുപടിയായി ഇറാനെതിരെ മൂന്നാംഘട്ട യുദ്ധം പ്രഖ്യാപിച്ച് യുഎസ് സൈന്യം വീണ്ടും ആക്രമണത്തിനൊരുങ്ങുന്നു.
പക്ഷേ, ഇവിടെയാണ് സുപ്രധാന ചോദ്യം ഉയരുന്നത്. ഇറാന്റെ പരമോന്നത നേതാവ് ആയത്തുള്ള അലി ഖമനയിയെ അവര് വധിച്ചു. സൈനിക തലവന്മാരെ കൊന്നൊടുക്കി. രാജ്യം മുഴുവന് ബോംബിട്ടു തകര്ത്തു. എന്നിട്ടും… എന്തുകൊണ്ടാണ് ഇറാനെ പൂര്ണ്ണമായി കീഴടക്കാന് അമേരിക്കയ്ക്കോ ഇസ്രയേലിനോ സാധിക്കാത്തത്? ഇറാഖിലെ സദ്ദാം ഹുസൈനെ മാറ്റിയതുപോലെ വെനസ്വേലയിലെ പ്രസിഡന്റിനെ പിടിച്ചുകെട്ടി കൊണ്ടുവന്നതുപോലെ ഇറാനിലെ ഭരണം അട്ടിമറിക്കാന് ട്രംപിനും കൂട്ടര്ക്കും എന്തുകൊണ്ട് കഴിയുന്നില്ല?
അമേരിക്ക വിചാരിച്ചത് പരമോന്നത നേതാവ് ആയത്തുള്ള അലി ഖമനയി കൊല്ലപ്പെടുന്നതോടെ ഇറാന് മുട്ടുകുത്തുമെന്നാണ്. ഭരണം തകരുമെന്നാണ്. എന്നാല് ഖമനയിയുടെ സംസ്കാര ചടങ്ങില് ഒഴുകിയെത്തിയ ലക്ഷക്കണക്കിന് ജനങ്ങള് ലോകത്തിന് നല്കിയ സന്ദേശം മറ്റൊന്നാണ്. പുതിയ നേതാവ് മൊജ്തബ ഖമനയി പ്രതികാരം പ്രഖ്യാപിച്ചു കഴിഞ്ഞു. അമേരിക്കന് അധിനിവേശത്തിനെതിരെ ഇറാനിലെ ജനങ്ങള് ഭിന്നതകളെല്ലാം മറന്ന് ഭരണകൂടത്തിനൊപ്പം ഒന്നിച്ചു നില്ക്കുകയാണ്. അതുകൊണ്ടാണ് ഇത്രയും വലിയ ആക്രമണം നടന്നിട്ടും ഹോര്മുസ് കടലിടുക്ക് അടച്ചുപൂട്ടാന് ഇറാന് ധൈര്യമുണ്ടായത്.
വെനിസ്വേലയിലോ ഇറാഖിലോ അമേരിക്ക പയറ്റിയ തന്ത്രങ്ങള് ഇറാനില് പരാജയപ്പെടാന് മൂന്ന് പ്രധാന കാരണങ്ങളുണ്ട്:
അതിശക്തമായ പ്രത്യയശാസ്ത്രം: ഇറാഖിലെ ഭരണം ജനങ്ങളില് നിന്ന് ഒറ്റപ്പെട്ടതായിരുന്നു. എന്നാല് ഇറാനില് 1979-ലെ വിപ്ലവത്തിന്റെ പ്രത്യയശാസ്ത്രം ജനങ്ങളുടെ ചോരയിലുണ്ട്. അമേരിക്കന് വിരുദ്ധത അവിടെയൊരു ദേശീയ വികാരമാണ്.
ആര്ക്കും തൊടാനാകാത്ത സമാന്തര സൈന്യം: ഇറാന്റെ റെവല്യൂഷണറി ഗാര്ഡ്സ് കേവലം ഒരു സൈന്യമല്ല. രാജ്യം മുഴുവന് വേരുകളുള്ള ഒരു വലിയ വ്യവസ്ഥിതിയാണ്. നേതാക്കള് മരിച്ചാലും പകരക്കാര് പെട്ടെന്ന് ചുമതലയേല്ക്കുന്ന ഒരു വികേന്ദ്രീകൃത കമാന്ഡ് ഘടനയാണവര്ക്കുള്ളത്.
ഹോര്മുസ് കടലിടുക്കിലെ ആധിപത്യം: ലോകത്തിലെ മൊത്തം പെട്രോളിയം വിതരണത്തിന്റെ 20 ശതമാനവും പോകുന്നത് ഈ കടലിടുക്കിലൂടെയാണ്. ഇതിലൂടെയുള്ള കപ്പല് ഗതാഗതം ഇറാന് തടഞ്ഞാല് അമേരിക്ക ഉള്പ്പെടെയുള്ള രാജ്യങ്ങളില് ഇന്ധനവില കുതിച്ചുയരും, ആഗോള സമ്പദ്വ്യവസ്ഥ തകരും. ഈ ഒരൊറ്റ ആയുധത്തിലാണ് ഇറാന്റെ മേല്ക്കൈ.അമേരിക്കയ്ക്ക് ഈ യുദ്ധത്തില് ഒരിക്കലും ഇറാനെ പൂര്ണ്ണമായി കീഴടക്കാനാവില്ല.
ഇനി അമേരിക്ക ഒരു കരയുദ്ധത്തിന് മുതിര്ന്നാല് അത് വിയറ്റ്നാമില് അവര് നേരിട്ടതിനേക്കാള് വലിയ ദുരന്തമാകും. കാരണം മലനിരകള് നിറഞ്ഞ ഇറാന്റെ മണ്ണില് യുഎസ് സൈന്യത്തിന് മുന്നേറാനാകില്ല. മാത്രമല്ല, റഷ്യയുടെയും ചൈനയുടെയും പരോക്ഷ പിന്തുണ ഇറാനുണ്ട്.
പശ്ചിമേഷ്യയിലാകെ പടര്ന്നു കിടക്കുന്ന തങ്ങളുടെ പ്രോക്സി ഗ്രൂപ്പുകളായ ഹിസ്ബുള്ളയെയും ഹൂതികളെയും ഉപയോഗിച്ച് ഇസ്രയേലിനെയും യുഎസ് താവളങ്ങളെയും ആക്രമിക്കാനും ഇറാന് ശ്രമിക്കും.
ചുരുക്കത്തില് നേതാക്കളെ കൊന്ന് ഇറാനെ തകര്ക്കാമെന്നത് അമേരിക്കയുടെ പാളിപ്പോയ കണക്കുകൂട്ടലാണ്. ഹോര്മുസ് കടലിടുക്കില് ഇറാന് പിടിച്ചിരിക്കുന്ന പിടി അയയുന്നതുവരെ ഈ യുദ്ധത്തില് ജയം പ്രഖ്യാപിക്കാന് അമേരിക്കയ്ക്ക് കഴിയില്ല.
