ഡെറാഡൂണ്: ഉത്തരാഖണ്ഡില് മേഘവിസ്ഫോടനത്തെ തുടര്ന്ന് നദികള് കരകവിഞ്ഞൊഴുകി കനത്ത നാശം വിതച്ചു. തെഹ്രി ഗര്വാള് പ്രദേശത്തുണ്ടായ മേഘവിസ്ഫോടനത്തില് റോഡുകളും പാലങ്ങളും തകര്ന്നു. വീടുകളില് വെള്ളംകയറി. കൃഷിസ്ഥലങ്ങളും വെള്ളത്തിനടിയിലായി. വ്യാപക നാശനഷ്ടങ്ങള് സംഭവിച്ചതായാണ് റിപ്പോര്ട്ടുകള്.
ജഖാന, ടോളി, ഗെന്വാലി മേഖലകളില് അര്ദ്ധരാത്രി മുതല് കനത്ത മഴയാണ് അനുഭവപ്പെട്ടതെന്നും ബാല് ഗംഗയില് പെട്ടെന്നുണ്ടായ വെള്ളപ്പൊക്കം വയലുകളും വീടുകളും വെള്ളത്തിനടിയിലാക്കിയെന്നും ജില്ലാ കളക്ടര് മയൂര് ദീക്ഷിത് അറിയിച്ചു. നദിയോട് ചേര്ന്നുള്ള മേഖലയില് താമസിച്ചിരുന്നവരെ സുരക്ഷിത മേഖലയിലേക്ക് മാറ്റി പാര്പ്പിച്ചതായും ആളപായം റിപ്പോര്ട്ട് ചെയ്തിട്ടില്ലെന്നും അധികൃതര് വ്യക്തമാക്കി.
കഴിഞ്ഞ കുറച്ച് ദിവസങ്ങളായി ഉത്തരാഖണ്ഡിലെ വിവിധ മേഖലകളില് ശക്തമായ മഴയാണ് അനുഭവപ്പെടുന്നത്. വെള്ളപ്പൊക്കവും റോഡുകള് തകര്ന്നതും ഉള്പ്പെടെ ജനജീവിതം ദുസ്സഹമാക്കിയിട്ടുണ്ട്.
