പശ്ചിമേഷ്യന് രാഷ്ട്രീയത്തില് വലിയൊരു വഴിത്തിരിവാണ് ഇപ്പോള് സംഭവിക്കുന്നത്.
ഇറാനെതിരെയുള്ള യുദ്ധത്തില്നിന്ന് അമേരിക്ക പതുക്കെ പിന്വാങ്ങാന് ശ്രമിക്കുകയാണ്. നേരിട്ടൊരു സൈനിക ഏറ്റുമുട്ടലിന് പകരം, നയതന്ത്ര സമ്മര്ദ്ദത്തിലൂടെയും സാമ്പത്തിക ഉപരോധത്തിലൂടെയും ഇറാനെ തങ്ങളുടെ വഴിക്കു കൊണ്ടുവരാമെന്നാണ് ട്രംപ് ഭരണകൂടത്തിന്റെ കണക്കുകൂട്ടല്.
എന്നാല്, ഈ നിലപാടിനോട് ഇസ്രായേല് പ്രധാനമന്ത്രി നെതന്യാഹു തീരെ യോജിക്കുന്നില്ല. ഇറാന് ഏതെങ്കിലും തരത്തില് ആണവായുധം ഉണ്ടാക്കുന്ന ഘട്ടത്തിലേക്ക് എത്തുന്നതുവരെ കാത്തിരിക്കാന് കഴിയില്ലെന്നും, അമേരിക്കയില്ലെങ്കിലും ഇസ്രായേല് ഒറ്റയ്ക്ക് ഇറാനിലെ ആണവനിലയങ്ങളും സൈനിക കേന്ദ്രങ്ങളും ആക്രമിക്കുമെന്നാണ് നെതന്യാഹുവിന്റെ വ്യക്തമായ മുന്നറിയിപ്പ്.
ഇസ്രായേലില്നിന്ന് ആക്രമണ ഭീഷണി കടുക്കുമ്പോള്, മറുവശത്ത് ഇറാന് പൂര്ണ്ണമായും സൈനിക കേന്ദ്രീകൃത ഭരണത്തിലേക്ക് നീങ്ങുകയാണ്. ഇറാന്റെ പുതിയ പരമോന്നത നേതാവ് മുജ്തബ ഖമനയി രാജ്യത്തെ പരമോന്നത സുരക്ഷാ സമിതിയില് വന് അഴിച്ചുപണി നടത്തി. സുരക്ഷാ സമിതിയുടെ സെക്രട്ടറി സ്ഥാനത്തുനിന്ന് മുഹമ്മദ് ബാഗെര് സോല്ഖാദിറിനെ മാറ്റി. മുന് ഐആര്ജിസി കമാന്ഡറായ മൊഹ്സിന് റസായിയെ പുതിയ സെക്രട്ടറിയായി നിയമിച്ചു. സോല്ഖാദിറിനെ മുജ്തബയുടെ രാഷ്ട്രീയ ഉപദേശകനാക്കി.
ടെഹ്റാനിലും ടെല് അവീവിലും ഒരുപോലെ സംഭവിക്കുന്ന ഈ മാറ്റങ്ങള്ക്ക് വലിയ മാനങ്ങളുണ്ട്.
ഇറാന് ഭരണത്തില് ഐആര്ജിസി മേല്ക്കൈ നേടിയിരിക്കുകയാണ്. സുരക്ഷാ സമിതി സെക്രട്ടറിയായി നിയോഗിക്കപ്പെട്ട മൊഹ്സിന് റസായി സാധാരണ ഒരു ഉദ്യോഗസ്ഥനല്ല. 1980-കളില് ഇറാന്റെ വിപ്ലവ ഗാര്ഡിനെ നയിച്ച, കടുത്ത പാശ്ചാത്യ വിരുദ്ധ നിലപാടുള്ള തീവ്ര സൈനിക ചിന്താഗതിക്കാരനാണ്.
അദ്ദേഹത്തെ സുരക്ഷാ കൗണ്സിലിന്റെ തലപ്പത്ത് കൊണ്ടുവന്നതിലൂടെ ഇറാന്റെ പുതിയ നയമാണ് വ്യക്തമാകുന്നത്. ഇറാന് ഇനി നയതന്ത്ര ചര്ച്ചകള്ക്ക് അധികം സമയം കളയില്ല. ചര്ച്ചകളേക്കാള് തിരിച്ചടിക്ക് തന്നെയാണ് പ്രാധാന്യമെന്ന് ഇറാന് വ്യക്തമാക്കുന്നു.
അതേസമയം, വാഷിംഗ്ടണും ടെല് അവീവും തമ്മിലുള്ള അഭിപ്രായവ്യത്യാസം മറനീക്കി പുറത്തുവന്നിരിക്കുകയാണ്. ഒരു പൂര്ണ്ണ യുദ്ധത്തിലേക്ക് പോകാന് വാഷിംഗ്ടണ് താല്പര്യപ്പെടുന്നില്ല. എന്നാല് ഇസ്രായേലിന് നിലനില്പ്പിന്റെ പ്രശ്നമാണ്. അമേരിക്കയുടെ വ്യോമസേനയോ ആയുധ സഹായമോ ഇല്ലാതെ തന്നെ ഇറാനിലെ നടാന്സ് , ഫോര്ദോ ആണവനിലയങ്ങള് ആക്രമിക്കാന് ഇസ്രായേല് പ്രതിരോധ സേന പദ്ധതി തയ്യാറാക്കിക്കഴിഞ്ഞു.
ഇസ്രായേല് ഒറ്റയ്ക്ക് ആക്രമണം നടത്തിയാല് പശ്ചിമേഷ്യയില് ഉണ്ടാകാന് പോകുന്ന പ്രത്യാഘാതങ്ങള് ഭയാനകമായിരിക്കും:
ഇസ്രായേല് ആക്രമിച്ചാല്, മധ്യപൂര്വേഷ്യയിലുള്ള ഇസ്രായേലി കേന്ദ്രങ്ങളിലേക്കും ഇസ്രായേല് നഗരങ്ങളിലേക്കും ആയിരക്കണക്കിന് ബാലസ്റ്റിക് മിസൈലുകള് ഇറാന് തൊടുത്തുവിടും.
ഹോര്മുസ് കടലിടുക്ക് ഇറാന് പൂര്ണമായും ഉപരോധിക്കും. ഇത് ലോകവിപണിയില് ക്രൂഡോയില് വില ബാരലിന് 150 ഡോളറിന് മുകളിലേക്ക് എത്തിക്കും.
അമേരിക്ക നേരിട്ട് പങ്കാളിയായില്ലെങ്കിലും, ഇസ്രായേലിനെ സഹായിക്കുന്നു എന്നാരോപിച്ച് ഗള്ഫ് മേഖലയിലുള്ള അമേരിക്കന് സൈനിക താവളങ്ങള്ക്ക് നേരെ ഇറാന് പിന്തുണയുള്ള ഗ്രൂപ്പുകള് ആക്രമണം കടുപ്പിക്കും.
പരമോന്നത നേതാവ് മുജ്തബ ഖമനയിയുടെ കീഴില് ഇറാന് യുദ്ധസജ്ജമായി മാറുകയും, നെതന്യാഹു ആക്രമണത്തിന് തിടുക്കം കൂട്ടുകയും ചെയ്യുന്നതോടെ, പശ്ചിമേഷ്യ ഒരു മഹാ യുദ്ധത്തിന്റെ മുനമ്പിലാണ് നില്ക്കുന്നത്. അമേരിക്ക മാറിനില്ക്കുകയും ഇസ്രായേല് ഒറ്റയ്ക്ക് യുദ്ധം തുടങ്ങുകയും ചെയ്താല് എന്തുസംഭവിക്കുമെന്ന് മുന്കൂട്ടി പറയാനാവില്ല.
