കല്പ്പറ്റ : വയനാട്ടിലെ ഉരുള്പൊട്ടല് ദുരന്തത്തില് തിരിച്ചറിയപ്പെടാത്ത മൃതദേഹങ്ങളുടെ സംസ്കാരം ഇന്ന്. തിരിച്ചറിയപ്പെടാത്ത മൃതദേഹങ്ങളില് 8 എണ്ണം ഇന്നലെ സംസ്കരിച്ചിരുന്നു. മരിച്ചവരുടെ എണ്ണം 402 ആയി. മണ്ണിനടിയില് നിന്നും ചാലിയാറില് നിന്നുമടക്കം കണ്ടെടുത്തവയില് 180 എണ്ണം ശരീരഭാഗങ്ങളാണ്.ഔദ്യോഗിക കണക്കനുസരിച്ച് മരണസംഖ്യ 222 ആണ്. 180 പേരെ ഇനിയും കണ്ടെത്താനുണ്ട്. ഉരുള് പൊട്ടലില് പരിക്കേറ്റ 91 പേര് ആശുപത്രിയില് ചികിത്സയില് തുടരുകയാണ്. വീട് നഷ്ടപ്പെട്ട 2514 പേരാണ് ദുരിതാശ്വാസ ക്യാമ്പുകളില് കഴിയുന്നത്.
ഇന്നത്തെ തെരച്ചലില് ചൂരല്മല വില്ലേജ് റോഡില് നിന്ന് രണ്ട് മൃതദേഹങ്ങള് കണ്ടെടുത്തു. ഇന്നലെ ചാലിയാര് പുഴയില് തെരച്ചിലിനിടെ കണ്ടെത്തിയ മൃതദേഹം ഹെലികോപ്ടറില് മേപ്പാടിയിലെത്തിച്ചു. 12 സോണുകളിലായി 50 പേര് വീതമുള്ള സംഘങ്ങളാണ് ഇന്ന് തെരച്ചില് നടത്തുന്നത്.
ജില്ലാ ഭരണകൂടം ആവശ്യപ്പെടുന്നതുവരെ തെരച്ചില് തുടരുമെന്നാണ് സൈന്യം അറിയിച്ചിരിക്കുന്നത്. ഘട്ടം ഘട്ടമായി തെരച്ചില് പ്രവര്ത്തനവും സംസ്ഥാന ഭരണകൂടത്തിന് കൈമാറാനാണ് സൈന്യത്തിന്റെ തീരുമാനം.
