കോഴിക്കോട്: കര്ണാടക ഷിരൂരില് ദേശീയപാതയില് വന് മണ്ണിടിച്ചില് അപകടത്തില്പ്പെച്ചെന്നു കരുതുന്ന കോഴിക്കോട് സ്വദേശി ഡ്രൈവര് അര്ജുനെക്കുറിച്ച് മൂന്നാം ദിവസവും വിവരം ലഭിച്ചിട്ടില്ല. രക്ഷാപ്രവര്ത്തനം തുടരുകയാണ്. ജിപിഎസ് സംവിധാനം വഴി പരിശോധിക്കുമ്പോള് മണ്ണിനടിയിലാണ് ലോറി കിടക്കുന്നത്. അര്ജുന് മടങ്ങിവരുമെന്ന പ്രതീക്ഷയിലാണ് ഭാര്യയും കുടുംബവും.
ദക്ഷിണ കന്നട ജില്ലയിലെ അങ്കോള താലൂക്കിലെ ഷിരുര് ഗ്രാമത്തിന് സമീപം ദേശീയ പാത 66-ല് ചൊവ്വാഴ്ചയാണ് അപകടം. മണ്ണിടിച്ചിലുണ്ടായ സ്ഥലത്ത് ഒരു ചായക്കട ഉണ്ടായിരുന്നതായി പ്രദേശവാസികള് പറഞ്ഞിരുന്നു. ഇവിടെനിന്ന് ചായകുടിക്കാനായി വണ്ടി നിര്ത്തിയവരാണ് അപകടത്തില്പെട്ടതെന്നാണ് അറിയുന്നത്. ഒരു കുടുംബത്തിലെ അഞ്ചുപേരുടെ ഉള്പ്പെടെ പത്ത് മൃതദേഹങ്ങള് കഴിഞ്ഞദിവസം ഇവിടെ നിന്നും പുറത്തെടുത്തിരുന്നു. ഇതിനിടെയാണ് അര്ജുനും അപകടത്തില് ഉള്പ്പെട്ടിട്ടുണ്ടോ എന്ന ആശങ്ക ഉയര്ന്നത്.
അര്ജുന് മണ്ണിനിടയിലായ ലോറിക്കുള്ളില് തന്നെയുണ്ടെന്ന പ്രതീക്ഷയിലാണ് അര്ജുന്റെ ഭാര്യ കൃഷ്ണപ്രിയ. അര്ജുന്റെ രണ്ടാമത്തെ മൊബൈല് നമ്പറില് വിളിച്ചപ്പോള് വീണ്ടും റിങ് ചെയ്തതാണ് കുടുംബത്തിന് പ്രതീക്ഷ നല്കുന്നത്. നിലവില് സ്വിച്ച് ഓഫാണ്. അതേസമയം, രക്ഷാപ്രവര്ത്തനം കാര്യക്ഷമം അല്ലെന്ന് കുടുംബം ആരോപിച്ചു. സംസ്ഥാന സര്ക്കാരിന്റെ അടിയന്തര ഇടപെടല് വേണമെന്ന് ഭാര്യയും സഹോദരിയും ആവശ്യപ്പെട്ടു.
ലോറിയില് അര്ജുന് ഒറ്റക്കാണെന്നും സ്ഥിരമായി പോകുന്ന റൂട്ടാണെന്നും ഭാര്യ പറഞ്ഞു. ഫോണ് റിങ് ചെയ്തതെങ്കിലും പ്രതികരണം ഉണ്ടായിട്ടില്ല. വീണ്ടും നമ്പര് സ്വിച്ച് ഓഫായെന്നും ഭാര്യ പറഞ്ഞു. രണ്ടു ഫോണുകളാണ് അര്ജുനുള്ളത്. ഇതില് ആദ്യത്തെ ഫോണ് നേരത്തെ തന്നെ സ്വിച്ച് ഓഫായിരുന്നു. ഇന്നലെ രണ്ടാമത്തെ ഫോണിലേക്ക് വിളിച്ചപ്പോള് റിങ് ചെയ്തപ്പോള് സ്വിച്ച് ഓഫായിരുന്നു. ഇതേ ഫോണില് ഇന്ന് രാവിലെ വീണ്ടും വിളിച്ചപ്പോഴാണ് വീണ്ടും റിങ് ചെയ്തതെന്നും കുടുംബം പറയുന്നത്.
അതേസമയം, ഇന്നാണ് വിവരം അറിയുന്നതെന്നും ഉദ്യോഗസ്ഥ തലത്തില് ബന്ധപ്പെട്ടിട്ടുണ്ടെന്നും അര്ജുനെ കണ്ടെത്താനുള്ള നടപടിയുണ്ടാകുമെന്നും ഗതാഗത മന്ത്രി കെബി ഗണേഷ് കുമാര് പറഞ്ഞു. കര്ണാടക ഗതാഗത മന്ത്രിടുമായും ആഭ്യന്തര മന്ത്രിയുമായും ബന്ധപ്പെടാന് ശ്രമിക്കുന്നുണ്ടെന്നും രണ്ടു ദിവസമായിട്ടും വിവരങ്ങള് വന്നിട്ടില്ലെന്നത് ദൗര്ഭാഗ്യകരമായ സംഭവമാണെന്നും ഗതാഗത മന്ത്രി പറഞ്ഞു.
സംഭവ സ്ഥലത്ത് ഉത്തര കന്നട ജില്ലയിലെ എസ്പി അടക്കമുള്ളവരുണ്ടെന്നും നാവികസേനയെ എത്തിയശേഷം രക്ഷാപ്രവര്ത്തനം ആരംഭിക്കുമെന്നും എസ്പിയുമായി സംസാരിച്ചുവെന്നും കോഴിക്കോട് എംപി എംകെ രാഘവന് പറഞ്ഞു. മണ്ണ് നീക്കം ചെയ്തുള്ള രക്ഷാപ്രവര്ത്തനവും ആരംഭിക്കുമെന്നാണ് അറിയിച്ചിട്ടുള്ളത്. ഉത്തര കന്നട ജില്ലയുടെ ചുമതലയുള്ള മന്ത്രിയുമായും ബന്ധപ്പെടുന്നുണ്ട്. കര്ണാടക മുഖ്യമന്ത്രിയുമായും ആഭ്യന്തര മന്ത്രിയുമായും ബന്ധപ്പെടുമെന്നും അദ്ദേഹം പറഞ്ഞു. കനത്ത മഴ രക്ഷാപ്രവര്ത്തനത്തിന് വെല്ലുവിളിയാണെന്നും അദ്ദേഹം പറഞ്ഞു.
