വയനാട്: മേപ്പാടി മുണ്ടക്കൈ ടൗണിലും ചൂരല്മലയിലുമുണ്ടായ വന് ഉരുള്പൊട്ടലില് മരണം108ആയി. പുലര്ച്ചെ ഒരു മണിയോടെ കനത്ത മഴയ്ക്കിടെയാണ് ഉരുള്പൊട്ടിയത്. രക്ഷാപ്രവര്ത്തനം നടക്കുന്നതിനിടെ നാലു മണിയോടെ വീണ്ടും ഉരുള്പൊട്ടി. മരണ സംഖ്യ ഇനിയും ഉയരാനാണ് സാധ്യതയെന്ന് ജില്ലാ ഭരണകൂടം അറിയിച്ചു. വയനാട്ടില് ശക്തമായ മഴ തുടരുന്നതിനാല് രക്ഷാപ്രവര്ത്തനവും ദുഷ്കരമാവുകയാണ്.
ലയങ്ങള് കേന്ദ്രീകരിച്ച് രക്ഷാപ്രവര്ത്തനം തടത്തുന്നതായി സന്നദ്ധപ്രവര്ത്തകര് പറഞ്ഞു.
മൂന്ന് ലയങ്ങള് ഒലിച്ചു പോയി. ആയിരക്കണക്കിന് പേരാണ് രക്ഷാപ്രവര്ത്തനങ്ങളില് ഏര്പ്പെട്ടിരിക്കുന്നത്. മണ്ണിനടിയില് നിരവധി പേരാണ് കുടങ്ങിക്കിടക്കുന്നത്. നിരവധി വീടുകള് മണ്ണിനടിയിലാണെന്നാണ് അവിടെ നിന്നും ലഭിക്കുന്ന റിപ്പോര്ട്ടുകള് പറയുന്നത്.
ചാലിയാറില് നിന്ന് മാത്രം കണ്ടെടുത്തത് 10 മൃതദേഹങ്ങളാണ്. മുണ്ടക്കൈ ഇപ്പോഴും ഒറ്റപ്പെട്ട അവസ്ഥയിലാണ്. ഒരു പ്രദേശമാകെ ഒലിച്ചു പോയിരിക്കുകയാണ്. രാത്രി ഒരു മണിക്ക് ശേഷമാണ് ദുരന്തമുണ്ടായത്. ഉറക്കത്തിലാണ് വെള്ളം കുത്തിയൊലിച്ചെത്തിയത്. നൂറിലേറെ പേര് ഇപ്പോഴും മണ്ണിനടിയിലുണ്ടെന്നാണ് സൂചന. രക്ഷാപ്രവര്ത്തനത്തിന് ഏഴിമലയില് നിന്ന് നാവികസേനയെത്തിയിട്ടുണ്ട്.
5 ഇടങ്ങളിലായിട്ടാണ് മൃതദേഹങ്ങള് സൂക്ഷിച്ചിരിക്കുന്നത്. മേപ്പാടി ഹെല്ത്ത് സെന്ററിലെത്തിച്ച 40 മൃതദേഹങ്ങളില്- 21 പേരെ മാത്രമാണ് തിരിച്ചറിഞ്ഞത്. വിംസ് ആശുപത്രിയില് 8 മൃതദേഹങ്ങളില്- രണ്ട് പേരെ തിരിച്ചറിഞ്ഞു. വൈത്തിരി താലൂക്ക് ആശുപത്രി ഒന്നും, മലപ്പുറം പോത്തുകല്ല് പ്രദേശത്ത് നിന്ന് ലഭിച്ച 10 മൃതദേഹങ്ങളില് എട്ടെണ്ണം നിലമ്പൂര് ജില്ലാ ആശുപത്രിയിലുമുണ്ട്.
