പാലക്കാട്: ചിറ്റൂര് പുഴയിലെ ശക്തമായ നീരൊഴുക്കില് കുടുങ്ങിയ സ്ത്രീ ഉള്പ്പെടെയുള്ള നാലു പേരെ അതിസാഹസിക രക്ഷാദൗത്യത്തിലൂടെ ഫയര്ഫോഴ്സ് രക്ഷപ്പെടുത്തി. പുഴയുടെ നടുവില് പാറക്കെട്ടില് കുടുങ്ങിയ നാലുപേരെയും വടംകെട്ടിയശേഷം ലൈഫ് ജാക്കറ്റ് ധരിപ്പിച്ചാണ് കരയിലേക്ക് എത്തിച്ചത്.
പുഴയില് നാലുപേരും കുടുങ്ങിയ ഉടനെ തന്നെ വിവരം അറിഞ്ഞ് ഫയര്ഫോഴ്സ് സംഘം സ്ഥലത്തെത്തി രക്ഷാപ്രവര്ത്തനം ആരംഭിക്കുകയായിരുന്നു. അരമണിക്കൂറിനുള്ളില് തന്നെ നാലുപേരെയും പുറത്തെത്തിക്കാനായി. ശക്തമായ നീരൊഴുക്കിനെ അതിജീവിച്ചാണ് അതീവദുഷ്കരമായ രക്ഷാദൗത്യം ഫയര്ഫോഴ്സ് നടത്തിയത്. മൂലത്തറ റെഗുലേറ്ററിന്റെ ഷട്ടറുകള് തുറന്നതോടെയാണ് ചിറ്റൂര് പുഴയില് വെള്ളം കൂടിയത്. അതിശക്തമായ നീരൊഴുക്കാണ് പുഴയിലുണ്ടായത്.
ചിറ്റൂരില് താമസിക്കുന്ന മൈസൂരു സ്വദേശികളായ നാലുപേരാണ് പുഴയില് കുടുങ്ങിയത്.പ്രായമായ ഒരു സ്ത്രീയും ഒരു പുരുഷനും രണ്ടു യുവാക്കളുമാണ് കുടുങ്ങിയത്. ഇറങ്ങുമ്പോള് വെള്ളം അധികം ഉണ്ടായിരുന്നില്ലെന്നും സംഘത്തിലുണ്ടായിരുന്ന മറ്റുള്ളവര് ആദ്യം കയറിപ്പോയിരുന്നുവെന്നും രക്ഷപ്പെട്ടവര് പറഞ്ഞു.
മന്ത്രി കൃഷണന്കുട്ടിയും സംഘവും സ്ഥലത്തെത്തി രക്ഷാപ്രവര്ത്തനത്തിന് നേതൃത്വം നല്കി. പുഴയില് വീണ്ടും ജലനിരപ്പ് ഉയരുന്നതിന് മുമ്പെ തന്നെ നാലുപേരെയും സുരക്ഷിത സ്ഥാനത്തേക്ക് മാറ്റിയതിനാലാണ് വലിയ അപകടം ഒഴിവായത്.
